Maisugon nga gibarugan ni Pangulong Ferdinand Bongbong Marcos Jr. atol sa defense summit sa Singapore ang katungod sa Pilipinas sa giilogang teritoryo sa West Philippine Sea.
Sa keynote speech sa Presidente sa Shangri La Dialogue sa International Institute of Strategic Studies kon Double “I”, Double “S” kagabie, unang gibutyag sa Presidente nga sa panahon pa lamang sa mga kastila, klaro nang giyagyag kung asa taman ang teritoryo sa Pilipinas nga gipalig-on pa sa Treaty of Paris, Washington ingon man sa United Nation Convention on the Law of the Sea kon UNCLOS.
Nakabase ang territorial claim sa Pilipinas sa international law, ug dili kay sa imahinasyon lamang.
Ang pamahayag ni President Marcos, wala lang nakapokus sa territorial claim sa Pilipinas sa West Philippine Sea, kun dili, lakip sa tensyon sa United States of America ingon man sa China nga nakaapekto na sa pagdesisyon sa mga kanasuran ingon man sa kinatibuk-ang seguridad.
Makaapekto matud pa kini sa pangkalibutanhong ekonomiya tungod kay agianan man ang maong dagat sa mga pamatigayon sa mga kanasuran.
Dugang niini nga isipon na sa Pilipinas nga “act of war” ang gihimo sa China nga pagpamomba sa mga barko sa Pilipinas ugaling aduna nay mamatay nga Pilipino tungod niini, mapasibliyan man o militar, mangayo na gayud ug tabang ang Pilipinas sa mga kaalyadong nasod niini sama sa Amerika.
