GENERAL SANTOS CITY – Gibarugan sa kapulisan nga misukol kanila ang most wanted person nga target sa ilang gipahigayong operasyon sa Purok 4, Sitio Amgoo, Barangay Landan, Polomolok South Cotabato sa milabay nga adlaw sukwahi sa pahayag sa pamilya nga ang ilang kabanay ang wala misukol sa otoridad.
Giila sa kapulisan ang target nga si Roberto Macantal alias Bel Macantal 44 anyos nga nanimuyo sa maong lugar kansa wanted sa kasong murder nga gipakanaug sa sala nilang Hon. Judge Allan Edwin Boncavil sa RTC Branch 62, Hon Judge Adelbert Santillan sa RTC Br 63, ingon man mga kasong frustrated murder ug arson.
Matud ni PLtC. Johnny Rick Medel, hepe sa Polomolok Municipal Police Station, mag-serve na unta ang kapulisan ug mga warrant of arrest ni Macantal gamit ang ‘unmarked vehicle’ sa dihang naka matikod ang suspect nga pulis ang sakay sa maong sakyanan ug nagpabuto sa iyahang armas nga miigo sa sakyanan nga gamit sa kapulisan.
Mibalos matud pa ang kapulisan nga miresulta sa pag binayluanay ug bala kung asa gihimo kini nga higayun sa anak sa nahisgutang suspect nga si Fritz Macantal nga usa usab sa mga target ug lain pang kauban nga musibat padulong sa Malungon nga direksyon.
Human sa maong binayluanay ug bala naigo si Macantal sa lawas.
Gibutyag usab sa opisyal nga nadakpan na ang lain pang target suspect sa Malungon. Sumala sa kapulisan nga si Macantal ang top 2 most wanted sa Municipal Level, Top 3 most wanted Provincial level ug top 9 sa regional level.
