GENERAL SANTOS CITY – Nakig-alayon ang kapulisan sa Sultan Kudarat ngadto sa mga otoridad sa Iloilo human nasikop ang usa ka wanted.
Giila ang suspek nga si Lourdyn Ralph Jasa, 18 anyos nga nag-atubang ug double murder sa pagpatay sa managsuon nga si Skeet Ryan Latosa, onse anyos ug Rich Wesley Latosa, dyes anyos nga pulos residente sa San Matias , Dingle, Iloilo City kaniadtong 2016.
Atul sa pagdakop gibasahan sa kapulisan ang suspek sa warrant of arrest nga giisyu ni Regional Trial Court (RTC) Branch 68 Judge Vicente Go sa Dumangas, Iloilo.
Nasikop ang suspek didto sa Esperanza, Sultan Kudarat human magtago ug upat ka tuig sa lugar.
Kahinumduman nga gikasuhan sa pamilya Latosa ang suspek human human nadiskubre nga nagkadugo ang sapot niini nga nakuha sa iyang lawak kung asa nakita ang patay nga lawas sa mga biktima.
Gibunalan matud pa ug bara sa suspek ang managsuon human gigamit sa mga biktima ang cellphone niini.
Sa kasamtangan nabalhug na selda ang nasampit samtang giandam ang pagdala balik sa Iloilo aron atubangon ang kaso.
