Walo ang namatay ug usa ang na-comatose sa panagbangga sa tulo ka mga sakyanan kaganinang alas-2:45 sa kaadlawon, Hulyo 19, sa national highway sa Barangay San Pedro-San Pablo, lungsod sa Aurora, Isabela.
Sumala ni Capt. Terrence Tomas, tigpamaba sa kapulisan sa Isabela, gilangkuban ang aksidente sa usa ka six-wheeler truck ug duha ka passenger vans.
Migawas sa inisyal nga imbestigasyon nga ang trak, nga gimanehuan ni October De Leon nga taga-Echague, misulod sa pikas lane ug nabangga ang van nga adunay 16 ka pasahero nga gimaneho ni Ron Ron Onalan kansa mibangga usab ang ikaduhang van nga adunay 9 ka pasahero, nga gimaneho ni Oseas Calderon.
Si Calderon apil sa mga gideklarang dead on arrival sa Cabatuan Family Medical Hospital ka-uban sila Niches Heizle Cagayongan, Claribel Maling, Jing Romboa, ug upat pa ka wala mailhi nga pasahero nga tanan taga-Turod Bulog, Tabuk City, Kalinga. Duha usab ang samaran sa maong insidente ug usa ang kritikal nga pulos gikan sa van nga gimaneho ni Onalan.
Sigon sa usa sa mga survivors nga si Jers Sabado, sa tunga nga bahin siya naglingkod rason nga igo lang siya nagasgas samtang kritikal ang usa niya ka tapad.
Kadaghanan matud pa sa iyang mga kasakay taga-Tabuk City, Kalinga ug mibiyahe sila kagabii gikan sa Baguio City.
Dili usab niya masaysay kung kinsa ang sad-an sa maong hitabo tungod kay natulog siya dihang natigayon ang insidente ug karon, dako ang iyang pagpasalamat sa bag-ong kinabuhi nga gihatag kaniya sa Kahitas-an.
