GENERAL SANTOS CITY – Gipaklaro ni Science Research Specialist Nane Danlag sa Phivolcs GenSan nga walay abnormalidad nga namatikdan ang ilang buhatan sa Mt. Matutum og Parker ning higayona.
Kini ang iyang pagpaklaro human nga nagbuto ang Bulkang Taal og nahimong hisgutanan sa social media ang 24 ka bulkan sa tibook Pilipinas nga aktibo.
Matud pa ni Danlag nga aduna silay mga instrumento nga gibutang sa Mt. Matutum og Mt. Parker nga konektado sa ilang buhatan.
Nasayran nga ang Mt. Matutum ang ulahing nagbusikad kaniadtong 1911.
Iyang gibutyag nga gawas sa mga himan nga ilang gimontar nga masayran direkta sa Phivolcs office ang kalihokan sa bulkan, ang indikasyon nga magbuto nga mukanaog ang mga hayop sa kalasangan gumikan sa kainit nga gibuga sa bulkan og mamatay ang mga tanum sa taas nga bahin.
Iyang gipaklaro nga kaniadtong January 4, 1641 ang labing ulahing pagbusikad sa Mt. Parker og ang nahitabo kaniadtong 1995 nga nagresula sa halapad nga pagbaha ang gumikan sa laing rason.
Makonsidera nga aktibo ang bulkan nga may kasaysayan nga nagbusikad bisag dugay na nga panahon nga nasayran nga nag-alburoto pinaagi sa pag-interview sa mga edaran o kaha sa pagtuon nga gihimo sa mga bato nga nakuha nga ang samples ang nga gidala sa Amerika.
