GENERAL SANTOS CITY – Gikwestiyon karon sa usa ka abogado nganong wala pay gihimong lakang ang Philippine National Police (PNP) kalabot sa gipagawas nga Cease and Desist Order (CDO) sa Securities and Exchange Commission (SEC) batok sa Kabus Padatuon o KAPA Community Ministry International Inc.
Sa pakighinabi sa Bombo Radyo kang Atty Rogelio Garcia sa Partido Demokratiko Pilipino and Lakas ng Bayan (PDP-Laban), gibutyag niini nga nahuman na ang lima ka adlaw nga gihatag sa KAPA alang sa paghatag sa ilang habig.
Hinungdan nga angayan na matud pang mulihok ang PNP aron ipatuman ang CDO, aron mahunong na ang operasyon sa naasoy’ng invesment scam.
Kahinumduman nga gibasura ni Hon. Presiding Judge Joyce Kho Mirabueno sa Regional Trial Court Branch 58 sa GenSan, ang mosyon sa KAPA nga magpagawas ug temporary restraining order (TRO) batok sa CDO nga gipagawas sa SEC.
Kahibaluan nga sa labing bag-ong advisory nga gipagawas sa komisyon, subli niining gipahimangnuan ang publiko nag dili mag-invest sa KAPA gumikan nagpabiling “effective” ug “valid” ang gipagawas nilang cease and desist order batok sa nasampit nga investment scam.
