Napakyas ang Kongreso sa pag-aproba sa gisugyot nga usbaw sa suholan sa mga minimum wage earners sa pribadong sektor. Sa kataposang adlaw sa sesyon sa ika 19th Congress, ang lain-laing bersyon sa Senado ug Kamara alang sa usbaw sa suholan wala mapasaka sa bicameral conference committee ug hangtod sa kataposan, ang Ubos Balay Balauranan nagdumili usab sa pagsagop sa ₱100 Daily Minimum Wage Hike Bill nga unang giaprobahan sa Upper House.
Sa pagpakita ni Senador Migz Zubiri, kinsa maoy author sa Wage Hike Bill sa Senado, subo niyang gipahibalo ang tanang trabahante ug minimum wage earners nga gihimo sa Senado ang tanan aron ipaglaban ang ilang katungod sa usbaw sa suholan.
Matod niya, padayong gi-insistir sa Kamara ang ₱200 nga usbaw sa suholan nga nahibaw-an sa mga gagmayng negosyo nga dili nila makaya ug kon mosagop ang Senado sa sugyot sa ubos balay-balauranan, i-veto kini sa presidente.
Una nang niingon si Senate President Chiz Escudero nga wa silay interes sa Senado nga suportahan ang ₱200 Wage Hike Bill sa Kamara tungod kay walay gitun-an ang mga kongresista, gawas pa nga napasar lang kini sa Ubos Balay Balauranan sa kataposang semana sa ilang sesyon.
Matod niya nga dili angay basulon sa Kamara ang Senado tungod kay ilang giaprobahan ang wage increase bill niadtong Pebrero 2024 samtang ang mga kongresista dugay na nga naglingkod niini ug karon sila na ang nagdali nga mapasa kini.
