Gitudlo sa testigo sa prosekusyon nga si COA supervising auditor Xylene Mae Del Campo si Vice President Sara Duterte isip usa sa mga opisyal nga adunay tulubagon sa P73.287 milyon nga disallowance sa confidential funds sa OVP.
Matud ni Del Campo, isip Head of Agency, si VP Sara giisip nga “accountable officer” tungod kay siya ang miapruba sa mga transaksyon ug paggamit sa cash advances niadtong Disyembre 2022.
Gawas kang VP Sara, gitumbok usab ang duha ka opisyal sa OVP nga adunay personal nga tulubagon—si Gina Acosta, Special Disbursing Officer, ug si Julieta Villadelrey, Chief Accountant.
Lakip sa mga nakit-ang paglapas sa COA ang kakulang sa official receipts ug sales invoices, ingon man ang paggamit sa P3.5 milyon alang sa mga kagamitan sama sa lamesa, lingkuranan, computer ug printer nga walay klarong pamatuod nga para sa confidential operations.
Gikuwestiyon usab ang P69.7 milyon nga reward payments tungod sa kakulang sa igo nga dokumentasyon.
Nabutyag usab nga gigamit ang pondo sa Christmas party ug tree-planting gikan Disyembre 13 hangtod 31, 2022, bisan pa nga opisyal lamang kining nadawat niadtong Disyembre 21.
Wala aprobahi sa COA Proper ang gihangyo nga review sa OVP, busa ang mga opisyal nga gitumbok sa disallowance mahimong kinahanglan nga motubag sa pagbalik sa maong pondo ngadto sa kaban sa katawhan.
