Gikuwestiyon ni Bise Presidente Sara Duterte ang pagsulay nga pag-aresto kang Senador Ronald “Bato” dela Rosa base sa warrant of arrest gikan sa International Criminal Court (ICC).
Sa usa ka interbyu sa The Hague, si VP Sara miingon nga ang bisan unsang warrant of arrest nga gikan sa laing nasud kinahanglan una nga ipresenta sa korte sa Pilipinas sa dili pa kini i-serve.
Dugang niya nga ang warrant of arrest nga wala gi-isyu sa korte sa Pilipinas kinahanglan una nga moagi sa local judicial process.
Kahinumduman nga si kanhi Presidente Rodrigo Duterte gidakop usab kaniadtong Marso 2025 base sa warrant gikan sa ICC kalabot sa campaign against illegal drugs sa iyang administrasyon.
Samtang, si dela Rosa mibalik sa Senado kagahapon human sa unom ka bulan nga pagkawala. Sa iyang pagbalik, ang mga operatiba sa National Bureau of Investigation (NBI) giingong misulay sa pag-serve kaniya sa warrant of arrest gikan sa ICC.
Ang warrant batok kang dela Rosa unang gi-isyu isip “sekreto” kaniadtong Nobyembre 6, 2025 ug may kalabutan sa mga pagpatay atol sa kasagsagan sa campaign against illegal drugs sa kanhi administrasyon.
Si Dela Rosa ang hepe sa Philippine National Police niadtong panahona, diin ang prosekusyon nagtuo nga si Dela Rosa nalambigit usab sa pagpatuman sa maong kampanya sa gubat batok sa droga.
Ang Senado temporaryo usab nga gipaubos sa lockdown samtang ang mga ahente sa NBI misulay sa pagduol kang dela Rosa.
Tungod niini, ang kampo ni Bato nagsang-at og manifestation manifestation for immediate judicial protection sa Supreme Court.
Sumala sa bag-ong Senate President nga si Alan Peter Cayetano, si dela Rosa dili dakpon human siya nakigsulti kang NBI Director Melvin Matibag.
Si Cayetano miingon nga ang posisyon sa Senado nga ang kaso sa pag-aresto kinahanglan una nga moagi sa mga korte sa Pilipinas sa dili pa ipatuman ang warrant.
Samtang, si Duterte nagdumili sa pagkomento sa pagbag-o sa liderato sa Senado nga miresulta sa pagpalagpot sa kanhi Senate President nga si Vicente Sotto III.
