Nagpagawas na og pamahayag si Bise Pres. Sara Duterte human siya gi-impeach sa Kamara.
Kini human nibotar ang 215 ka mga kongresista pabor sa impeachment complaint batok sa bise presidente niadtong Miyerkules.
Ila kining gihimo sa kataposang adlaw sa sesyon sa Kongreso.
Ang reklamo gilayon nga gipasa aron maapil sa impeachment trial sa Senado.
Apan posibling magsugod na ang trabaho sa taas nga balay karong Hunyo sumala pa sa pamahayag ni Senate President Francis “Chiz” Escudero.
Sa iyang pamahayag, si VP Duterte niingon sa mga pulong nga “God save the Philippines.”
Kana tungod kay nagkagrabe ang kahimtang sa nasud sa mga kamot sa mga opisyal niini nga nag-abuso sa gahom.
Niinsistir usab siya nga wa niya hulgaa si Presidente Ferdinand R. Marcos Jr., First Lady Liza Marcos, ug House Speaker Martin Romualdez ug ang mga sakop lang sa Kamara ang niingon nga iya kining gibuhat.
