Gilauman nga mosumiter si Vice President Sara Duterte sa iyang tubag sa Lunes, Marso 16, sa duha ka impeachment complaints batok kaniya human kini gideklarar nga adunay igong porma ug substansiya.
Sa usa ka press conference karong Sabado, Marso 14, ang miyembro sa House Committee on Justice ug Bicol Saro Representative nga si Terry Ridon mipahibalo nga ang 10 ka adlaw nga gihatag sa komite sa Bise Presidente karong hinapos sa semana aron pagtubag sa mga reklamo batok kaniya matapos na.
Kung ang Bise Presidente mosumiter og tubag sa Lunes, si Rep. Ridon miingon nga hatagan nila og higayon ang habig sa mga magbabalaod nga misuporta sa mga impeachment complaints ug dayon hatagan usab og higayon si VP Sara nga mopasaka sa iyang tubag.
Samtang, sumala ni Rep. Ridon, kung ang Bise Presidente mopasaka og tubag, ang Justice Committee ang motino kung ang mga impeachment complaints “igo na sa basehan” ug ang hearing proper gilauman nga ipahigayon sa Abril 8.
Gipasabot usab sa magbabalaod nga ang proseso sa impeachment mahimong mapamubo kung si VP Sara dili mopasaka og tubag sa Lunes.
Hugot usab nga gihimakak sa magbabalaod ang akusasyon sa Bise Presidente nga ang impeachment proceedings batok kaniya usa ka “fishing expedition.”
Samtang, ang sunod nga husay sa Justice Committee gikatakda sa Miyerkules, Marso 18.
Sumala ni Rep. Ridon, ang mosyon ni Rep. Chel Diokno bahin sa posibleng conflict of interest sa duha ka abogado ni VP Sara, ang kanhi Education ASec. for Procurement Atty. Reynold Munsayac ug kanhi DepEd Spokesperson Michael Poa, ang hisgutan dinhi.
