Bukas si Bise Presidente Sara Duterte sa pag-review sa iyang Statement of Assets, Liabilities and Net Worth (SALN) ni Ombudsman Jesus Crispin “Boying” Remulla.
Ang Bise Presidente mihimo niini nga pamahayag sa dihang gipangutana bahin sa iyang reaksyon sa pagrepaso ni Remulla sa iyang SALN.
Kahinumdoman nga ang bag-ong Ombudsman nipahibawo nga mopagawas siya og bag-ong memorandum sunod semana aron tugotan na usab ang mga opisyal sa gobyerno nga maka-access sa ilang SALN.
Ang bag-ong memo maoy mopuli sa polisiya nga gi-isyu niadtong 2020 ni kanhi Ombudsman Samuel Martires, nga nagpugong sa pag-access sa SALN.
Matod pa sa karaang memo, gikinahanglan gihapon ang notaryado nga letter of authority gikan sa usa ka opisyal sa dili pa makakuha sa ilang SALN hinungdan nga maglisod ang publiko ug media sa pagkuha og kopya.
