Nagsumite si Vice President Sara Duterte ug iyahang counter-affidavit sa Office of the Ombudsman agig tubag sa mga alegasyon kalabot sa giingong sayop nga paggamit sa confidential funds sa Office of the Vice President (OVP) ug sa Department of Education (DepEd)
Kahinumduman nga siya ang nangulo sa DepEd gikan niadtong 2022 hangtod sa iyang pag-resign niadtong Hulyo 2024.
Ang pagsumite sa counter-affidavit kabahin sa nagpadayon nga preliminary investigation sa Ombudsman, tungod sa reklamo sa House Committee on Good Government and Public Accountability.
Matod sa taho, nikabat sa P500 milyones ang confidential funds nga gigamit sa OVP ug P112.5 milyones sa DepEd ubos sa pamunoan ni Duterte.
Gawas kang Duterte, laing siyam ka opisyal sa OVP ug DepEd ang gihinganlan nga respondents sa kaso.
Ang mga alegasyon batok kanila naglakip sa plunder, technical malversation, falsification of public documents, perjury, bribery, ug betrayal of public trust.
Gihatagan sila sa Ombudsman og 10 ka adlaw gikan sa pagkadawat sa kamanduan sa pagsumite sa ilang mga tubag, uban ang mga affidavit sa mga saksi ug uban pang mga dokumento nga nagsuporta sa ilang habig.
Matod sa anti-graft body, ang kapakyas sa pagsumite sulod sa gitakdang panahon makonsiderar nga waiver sa katungod sa pagpresentar og ebidensya.
Kusganong gihimakak ni Duterte ang mga pasangil ug niinsister nga way iregularidad sa paggamit sa pundo ubos sa iyang pamunoan.
