GENERAL SANTOS CITY – “All the best my dearest brother..” Kabahin kini sa mensahe isip suporta sa Venezuelan actor nga si Fernando Carillo kang Fighting Senator Manny Pacquiao.
Kini sa promotional video nga gi-post ni Pacquiao sa iyang Instagram account kalabot sa giatangan nga away kang Adrien Broner sa Enero 19.
Sumala pa nga malipayon si Carillo alang kang Pacman, ug nagpasalamat nga giitangtang na sa Diyos ang mga gitawag niining “negative people” sa kampo sa Pinoy ring icon.
Dugang pa ni Carillo nga kanunay niining ginaapil sa pag-ampo si Pacquiao apil ang iyang pamilya.
Gipasalamatan usab niini si Manny alang sa iyang Bible, ug proud matud pa kang Pacman nga gitawag pa niining “brother.”
Kahinumduman nga nailhan si Carillo sa Pilipinas isip si Fernando Jose sa hit Mexican telenovela nga Rosalinda kung asa nakauban niya ang bida nga Mexican actress nga si Thalia.
Makapila ka higayon nang nakabisita sa nasud si Carillo sa nakalabay’ng mga tuig, kung asa ang ulahi kaniadtong 2015, ug nakigkita usab kang Pacquiao.
