Pormal nang gipahibalo sa Venezuela sa United Nations (UN) ang ilang desisyon nga hingpit nang mobiya sa International Criminal Court (ICC), tungod sa giingong “geographical bias” o pagpihig niini batok sa mga nasud sa Global South, ilabina sa Africa ug Latin America.
Sumala kang Foreign Minister Felix Plasencia, ang maong desisyon dili na mabalik ug kabahin sa pagsupak sa gobyerno sa imbestigasyon sa ICC may kalabotan sa giingong mga krimen batok sa katawhan nga gipasangil sa mga opisyal ug miyembro sa militar sa Venezuela sukad pa niadtong 2017.
Matod usab kang Acting President Delcy Rodriguez, nahimo nang politikal nga instrumento ang ICC aron atakehon ang estado ug katawhang Venezuelan, maong wala na sila mosalig sa maong internasyonal nga institusyon.
Kahinumdoman nga niadtong Disyembre 2025, mibotar ang National Assembly sa Venezuela aron bawi-on ang balaod nga nagratipikar sa Rome Statute, nga maoy naghatag og dalan alang sa pormal nga pag-atras sa nasud gikan sa ICC.
Samtang, kasabay sa maong desisyon, gitangtang usab sa mga miyembrong estado sa ICC si Prosecutor Karim Khan human siya mapasakaan og akusasyon sa sexual misconduct, nga iyang gipanghimakak.
Nahitabo ang pag-atras sa Venezuela gikan sa ICC taliwala sa transisyon sa kagamhanan human mapahawa sa poder si Nicolás Maduro, ug ubos sa liderato ni Acting President Delcy Rodriguez, nga giingong suod nga kaalyado sa administrasyon ni Donald Trump.
