GENERAL SANTOS CITY– Andam na ang preparasyon sa syudad sa Heneral Santos sa pagsugod sa vaccination program gamit ang Sinovac vaccine ugmang adlawa.
Positibo si Mayor Ronnel Rivera nga kung dili man mabakunahan ang tanan sa dakbayan apan maangkon ang herd immunity kon daghang ihap ang mabakunahan.
Matud niini, tumong sa ipahigayong pagbakuna nga mabalik sa normal ang kinabuhi og sundan kini sa pagpakusog balik sa ekonomiya.
Gibutyag pa ni Mayor Rivera nga angayang mahuman na ang paglisod sa mga katawhan tungod sa epekto sa covid 19.
Sama sa gibutyag sa DOH ang naasoy nga mga bakuna ang alang lamang sa mga health care workers luyo nga may lauman pang muabut alang sa sunod nga batch.
Kagahapon dihang miabut sa dakbayan ang 3,138 doses sa Sinovac vaccines alang sa mga medical frontliners nga gidiretso sa COVID-19 Command Center o ResBAKUNA Operations Center sa Lagao Gymnasium.
Gidawat nilang City Mayor Ronnel C. Rivera, IATF-MEREID Incident Commander Dr. Jett Gajete-Oco, Chief Administrative Officer Karl Vincent Quiepo, NIP Coordinator Dr. April Mae Maquilang, Provincial DOH officer Dr. Butch Dulduco og pipila ka Technical Working Group members ang mga naasoy nga bakuna gikan sa mga opisyales sa DOH 12.
Kauban nga nag-escort sa paghatod sa bakuna sa dakbayan gikan sa DOH Regional Office sa Cotabato ang City Disaster Risk Reduction and Management Office nga gipangunahan ni Dr. Bong Dacera og PNP kauban silang DOH 12 Spokesperson Arjohn Gangoso.
Nasayran nga mulungtad og pito ka adlaw ang campaign hinungdan og sugdan sa mga identified hospitals ang immunization ugmang adlawa March 8 hang tod Marso 14.
Ang Mindanao Medical Center ang mudawat og 380 vials sa Sinovac vaccine, Gensan Medical Center-343, St. Elizabeth Hospital Inc.-697, General Santos Doctors Hospital-527, Socsargen County Hospital-521 og ang Dr. Jorge P. Royeca City Hospital- 670.
Kagahapon gihimo ang serye sa simulation exercises sa Dr. Jeorge P. Royeca Hospital apil usab ang St. Elizabeth Hospital aron tan-awon ang kaandam niini samtang himuon usab ang simulation sa upat pa ka pribadong tambalanan karong adlawa.
