GENERAL SANTOS CITY – Nagbangutan karon ang usa ka pamilya human madunggaban-patay ang usa nila ka mahal sa kinabuhi, kung asa ang suspek paryente usab nila, tungod sa babaye.
Nakabsan na sa kinabuhi human ang pipila ka adlaw nga pagpabilin sa ospital, ang biktima nga giilang si Ignacio Laviste, 49-anyos, residente sa Brgy Mabuhay ning dakbayan.
Sa impormasyon, nag-inom matud pa ang biktima dihang miabot ang suspek nga si Melvin Matubato, dala ang iyang kapuyo.
Nasuko matud pa ang suspek sa biktima human nga gihikap matud pa niini ang sampot sa iyang kapuyo. Nagsinumbagay matud pa ang duruha nga misangko sa pagpanunggab. Wala na nakaluwas pa ang biktima human gidunggab gamit ang buak nga botelya.
Apan matud sa asawa sa biktima, wala niini tuyua nga mahikapan ang pribadong bahin sa lawas sa kapuyo sa suspek.
Sumala pa nga gibira lamang sa biktima ang babaye aron palingkuron, aron mukanta sa videoke.
Sa karon, desidido ang pamilya sa biktima nga kasuhan ang suspek ug murder, aron matud pa mapanubag sa gihimong krimen.
Kasamtangang gihaya sa ilang panimalay ang patay’ng lawas sa biktima, ug kasamtangang ginahikay ang mga dokumento aron mapasakaan na ug kaso ang suspek nga balhug na karon sa San Isidro Police Station.
