GENERAL SANTOS CITY – Nangalap og dugang impormasyon ang kapulisan kalabot sa pagpamusil patay sa usa ka utility sa Bulaong Terminal sa P.I. 3, Brgy Dadiangas North ning syudad hilabi na nga katingad-an kanila ang motibo sa krimen.
Matud kang P/Captain Abdulsalam Mamalinta Jr., hepe sa Pendatun Police Station, sa pagsaysay sa pamilya sa biktima nga si Jesrey Canoto, 34 anyos nga wala kini nakaaway o nakalalis sa ilang lugar.
Bisan pa gani niadtong nagtrabaho pa lang nga messenger sa Barangay Hall sa North una pa man gi-assign sa Bulaong terminal walay nakabangi ang nasampit.
Gibutyag ni Mamalinta nga wala usab rekord sa ilang presinto ang biktima hinungdan katingad-an ang pagpatay niini.
Pauli ang biktima gikan sa trabaho dihang gipusil sa duha ka wala mailhing suspek sa ulo nga bahin hinungdan nga diha diha namatay gilayon. Hustisya ang singgit sa pamilya hilabina nga nabilin niini ang asawa og lima ka mga anak.
