Gidakop sa mga pulis sa Argentina ang usa sa 2 ka lalaki nga giakusahan nga nagsuplay og droga sa kanhi miyembro sa One Direction (1D) nga si Liam Payne sa wala pa siya mamatay human mahulog gikan sa ikatulong andana sa iyang kwarto sa hotel sa Buenos Aires niadtong Oktubre 16, 2024.
Kini nga indibidwal giila nga si Brian Paiz, usa sa 5 ka mga akusado nga giakusahan may kalabotan sa kamatayon ni Payne. Ang 3 sa 5 ka mga akusado kaniadto gipasakaan og kasong manslaughter ug ang laing 2 gikiha tungod sa pag-supply og ilegal nga drugas sumala sa mga piskal nga nagdumala sa kaso.
Sumala sa Prosecutors, ang British singer miinom og cocaine, ingon man ang alkohol ug mga reseta nga antidepressant sa wala pa mahulog gikan sa balkonahe sa iyang lawak sa Casa Sur Hotel.
Ang 24-anyos nga si Paiz giakusahan nga nag-supply og drugas ngadto kang Payne 2 ka adlaw sa wala pa kini mitaliwan. Girekisa usab sa kapolisan ang balay sa maong drug supplier.
Apan sa pakighinabi kaniya niadtong Nobiyembre, iyang gihimakak ang maong pasangil bisan pa nga iyang giangkon nga nahimamat niya si Liam ug kauban niya sa iyang hotel.
Gipanghimakak usab ni Paiz nga nakadawat siyag kuwarta sa iyang gisuplay nga drugas, apan ang huwes sa nahisgutang kaso niingon nga makita sa nahipos nga ebidensiya nga gibayran siya sa pag-supply og ilegal nga drugas.
