Usa patay, usa samaron sa banggaanay sa duha ka motor

GENERAL SANTOS CITY – Usa ang patay, usa ang angol human ang natigayong disgrasya sa dalan, sa Udagri, Brgy Conel ning siyudad.

Giila ang namatay nga si Reynaldo Buenaflor, nga angkas sa motorsiklo nga gimanehuan ni Roldan Esguerra nga samaron human sa aksidente.

Ang duha pulos residente sa Malungon, Sarangani.

Una niini, samtang ginasubay sa duruha ang diversion road, pasado alas-8:00 kagabii, kung asa nag-overtake matud pa sila sa usa ka pick-up, apan wala nakabantay sa kasugat nga motorsiklo, hinungdan sa aksidente.

Buak matud pa ang bagul-bagol ni Buenaflor nga maoy hinungdan sa iyang kamatayon.

Giimbestigahan na sa mga otoridad ang nasampit nga aksidente sa dalan.