GENERAL SANTOS CITY – Hugot ang pahimangno sa kapulisan nga maghinay lang sa pagmeneho sa sakyanan aron makalikay sa disgrasya.
Kini human sa natigayong aksidente kung asa mibangga sa pader ang gisakyan nga Toyota Innova sa Purok 6, Glamang, Polomolok South Cotabato.
Sa nasampit nga insidente patay si Marvin Dereguito 45 anyos nga residente sa a Lopez Jaena, Koronadal City samtang samaron ang iyang kauban nga silang Ronnie Gacias, 59 anyos og Roel Miramon, 57 anyos nga pulos taga Koronadal City.
Ang sakyanan gimanehuan ni Carlos Biongco Jr. 51 anyos nga residente sa Superville Koronadal City.
Sa imbestigasyon sa Polomolok PNP nga padulong sa GenSan ang mga biktima kung asa kusog ang dagan sa ilang sakyanan.
Matud pa nga wala namatikdan ang signage sa checkpoint hinungdan nga midiretso sa poste sa koryente hangtud sa nabangga sa pader.
Ang mga biktima ang gidala gilayon sa ospital aron maatiman sa doktor apan ang usa ang gideklara nga dead on arrival.
