Naaresto ang usa ka 43-anyos nga lalaki gikan South Africa sa Sabado sa gabii sa Ninoy Aquino International Airport (NAIA) Terminal 3 sa Pasay City human makuha sa iyang bagahe ang kapin pito ka kilo nga giingong shabu nga nagkantidad og P47.6 milyon.
Ang suspek ang giila nga si “Antonie” nga miabot alas 7:30 sa gabii sakay sa Cathay Airways Flight CX 748 gikan sa Hong Kong.
Base sa report sa Philippine National Police-Drug Enforcement Group (PDEG), narekober gikan sa bagahe sa suspetsado ang mga 7,000 gramos nga shabu.
Ang tanang nakumpiskang ebidensya gihatud sa PDEA Laboratory Service aron ipaubos sa qualitative ug quantitative examination ug para sa hustong disposisyon.
Ang operasyon gipahigayon pinaagi sa koordinasyon sa NAIA Inter-Agency Drug Interdiction Task Group diin kabahin ang PDEG.
Ang suspetsado mag-atubang og kaso ubos sa Comprehensive Dangerous Drugs Act nga nagdili sa pag-import og ilegal nga droga.
