Anaa karon sa kustudiya ang usa ka suspek human nakuha kaniya ang kapin P102,000 nga kantidad sa gituohang shabu atol sa gipahigayong joint anti-illegal drug ug anti-criminality operation sa kapulisan sa Surallah sa miaging Hulyo 18, 2025.
Gihimo ang operasyon sa kooperasyon sa Surallah Municipal Police Station, Provincial Drug Enforcement Unit, Provincial Intelligence Unit, ug 2nd Provincial Mobile Force Company sa South Cotabato Police Provincial Office, uban sa koordinasyon sa Philippine Drug Enforcement Agency (PDEA) Region 12.
Target sa ng operasyon mao alyas nga “Rod,” 56 anyos ug residente sa Surallah, pinaagi sa search warrant ubos sa Republic Act 9165 o Comprehensive Dangerous Drugs Act of 2002.
Sa pagsusi sa balay sa suspek, nakuha ang unom (6) ka sachet sa gituohang shabu nga may timbang nga 15 gramos ug gibanabana nga nagkantidad og P102,000.
Narekober usab sa operasyon ang usa ka kalibre .38 nga revolver nga may unom ka buhing bala, usa ka improvised firearm nga nailhan nga “sumpac,” usa ka buhing bala sa 12-gauge nga shotgun, duha ka improvised tooters, usa ka disposable lighter, ug usa ka digital weighing scale.
Ang tanang nakuha nga ebidensya ipasa sa South Cotabato Provincial Forensic Unit alang sa drug analysis ug ballistic examination.
