Gikumpirma sa Philippine Coast Guard (PCG) ang presensya sa duha ka barkong iggugubat sa US sulod sa 30 nautical miles sa Panatag (Scarborough) Shoal.
Ang USS Higgins (DDG-76), usa ka guided-missile destroyer, ug ang USS Cincinnati (LCS-20), usa ka littoral combat ship, gimonitor sa maong lugar pipila ka adlaw human sa pagbangga sa duha ka barko sa China sa kadagatan sa Pilipinas.
Matod ni Commodore Jay Tarriela, tigpamaba sa PCG sa West Philippine Sea, ang presensiya sa mga barko sa US nahitabo luyo sa insidente niadtong Agosto 11 diin usa ka barko sa China Coast Guard (CCG) nga may hull number 3104 ang nabangga sa usa ka barkong iggugubat sa People’s Liberation Army Navy (PLAN) samtang naggukod sa barko sa PCG nga BRP Suluan.
Sa report sa PCG, delikado nga pag-maniobra ang gihimo sa barko sa CCG nga maoy hinungdan sa pagkabangga.
Ang barko sa China nakaangkon og grabeng kadaot sa unahang bahin niini, samtang ang BRP Suluan nakalingkawas sa insidente.
Ang Panatag Shoal, nailhan usab nga Bajo de Masinloc, usa ka bahura nga nahimutang sulod sa 200-nautical miles Exclusive Economic Zone (EEZ) sa Pilipinas.
Bisan tuod dugay na kini nga bahin sa tradisyonal nga pangisdaan sa mga Pilipino, giangkon usab kini sa China ug padayon nga gibantayan sa mga coast guard ug navy niini.
Kaniadtong 2012, nagsugod ang tensyon sa lugar sa dihang nahitabo ang standoff tali sa Pilipinas ug China, nga miresulta sa de facto control sa China sa reef.
Ang pag-abot sa mga barkong iggugubat sa US kabahin sa mas lapad nga estratehiya sa Washington aron ipakita ang suporta sa mga kaalyado niini sa Indo-Pacific, lakip ang Pilipinas.
Ubos sa 1951 Mutual Defense Treaty, obligado ang Estados Unidos sa pagtubag sa mga armadong pag-atake batok sa mga pampublikong barko sa Pilipinas sa Pasipiko.
Bisan kung ang US dili direktang mangilabot sa mga panaglalis sa teritoryo, ang ilang presensya nakita nga mensahe sa pagpadayon sa kagawasan sa paglawig ug pagtahod sa International law.
Ang Pilipinas nagpadayon sa paghingusog sa maritime rights, base sa 2016 arbitral ruling nga mipabor sa nasud ug nag-invalidate sa halapad nga nine-dash line claim sa China.
Bisan pa sa mga insidente sa pagpanghasi sa mga mangingisda nga Pilipino, ang PCG nagpabiling aktibo sa paghatag og proteksyon ug pagmonitor sa mga kalihokan sa West Philippine Sea.
