Misamot karon ang mga pagbatikos nga nadawat ni United States President Joe Biden human ang usa ka oras niya nga news conference kon diin ang mga isyu wala lang nakasentro sa iyang edad.
Gipadayag niini nga anaa siya sa maayong panglawas ug siya ang pinakamaayong kandidato nga makapildi kang Donald Trump.
‘I am the best qualified person’.
Hugot usab nga gibarugan sa presidente sa pinasahi nga solo appearance niini atubangan sa mga reporters, nga kinahanglan niyang tapuson ang iyang trabaho, taliwala sa balik-balik nga mga pangutana kalabot sa krisis nga mitabon karon sa iyang kandidatura.
Ang maong news conference nakamatikod usab og pipila ka mga sayop sa mga gipangsulti ni Biden apil na niini ang pagtawag niya kang Vice-President Kamala Harris nga Vice-President Trump.
Una nang nasayop ang presidente dihang sa iyang pag-introduce kang Ukrainian President Volodymyr Zelensky, iya kining gitawag nga President Putin atol sa usa ka NATO event.
Sa pagkakaron, nadugangan pa ang mga miembro sa iyang kaugalingong Democratic Party nga nanawagan kaniya nga muatras na human ang minos niining performance sa debate sa miaging bulan.
