Palapdan sa United States State Department ang pag-screen sa mga social media account sa mga langyaw nga peryodista nga mangapply og visa aron makatrabaho sa Estados Unidos.
Kabahin kini sa gipalapdan nga polisiya sa administrasyon ni US President Donald Trump diin gikinahanglan sa mga aplikante nga himuong public ang ilang social media accounts aron masusi sa mga opisyal sa Amerika.
Apil usab sa maong screening ang mga aplikante sa pipila ka work visa alang sa mga trabahante gikan sa Canada ug Mexico.
Bisan wala gikumpirma sa US State Department ang sulod sa internal memo, giingon sa ahensya nga gigamit nila ang gitawag nga “online presence vetting” aron masiguro nga ang mga aplikante kwalipikado ubos sa balaod sa Amerika ug dili hulga sa nasudnong seguridad, kaluwasan sa publiko, o interes sa nasud.
Matud pa sa ahensya, nagagamit ang mga visa officer og nagkalain-laing pamaagi sa pagsusi sa mga aplikasyon aron malikayan ang pagpanglimbong ug mapanalipdan ang seguridad sa nasud.
Wala pa usab klaro kung kanus-a ipatuman ang gipalapdan nga polisiya.
Samtang, adunay mga grupo sa civil liberties advocates nga nagpahayag og kabalaka nga posible kini makaapekto sa kagawasan sa pagpahayag o freedom of speech.
