Gipahibalo sa Estados Unidos nga gitapos na niini ang naval blockade batok sa Iran human mipirma ang duha ka nasod og kasabutan nga nagtumong sa pagtapos sa tensyon sa Middle East.
Sumala sa US Central Command, gibaklas na nila ang blockade subay sa direktiba ni U.S. President Donald Trump.
Tungod niini, gibuksan pag-usab ang Strait of Hormuz, usa ka importante nga ruta nga agianan sa mga barko nga nagdala og lana ug uban pang mga produkto.
Nakuha ang impormasyon nga kabahin sa kasabutan ang diha-diha nga pagpahunong sa operasyon sa militar sa US kung mosunod ang Iran sa mga kondisyon sa kasabutan.
Lakip sa mga kondisyon mao ang pagguba sa Iran sa ilang mga imbakan sa enriched uranium ug ang pagpahunong sa pagpondo sa mga kaalyadong armadong grupo sa rehiyon.
Bisan pa nga nahimo na ang kasabutan, nagduhaduha gihapon si Iran Supreme Leader Mojtaba Khamenei niini. Matud niya, dili siya hingpit nga uyon sa kasabutan apan gitugotan niya kini nga ipadayon human makadawat og kasiguruhan gikan kang Iranian President Masoud Pezeshkian.
Gipahayag usab ni Khamenei nga dili pasabot nga tungod kay nahitabo ang kasabutan, mosunod na dayon ang Iran sa uban pang negosasyon uban sa Estados Unidos.
Samtang, miingon si Trump nga gilauman niya nga sundon sa tanang panig ang tigil-putukan aron magpadayon ang mga panaghisgot alang sa kalinaw.
Nagpahayag usab og suporta sa kasabutan si Israeli Prime Minister Benjamin Netanyahu ug gipasiugda ang kamahinungdanon sa lig-on nga relasyon tali sa Israel ug Amerika. Apan adunay pipila ka opisyal sa iyang gabinete nga misupak sa maong kasabutan.
Nasayran nga nakapaloob sa kasabutan ang pagpahunong sa bisan unsang gubat, pag-abli pag-usab sa Strait of Hormuz, pagpugong sa Iran nga makahimo og nuclear weapon, ug pagtukod og pondo nga moabot sa $300 billion alang sa pagpahiuli ug pagpalambo sa ekonomiya sa Iran.
Bisan pa niini, nagpadayon gihapon ang mga pag-atake tali sa Israel ug sa grupong Hezbollah sa Lebanon human ipahibalo ang kasabutan. Matud sa Israel, lahi ang ilang operasyon batok sa Hezbollah, samtang giingon naman sa Iran nga apil sa kasabutan uban sa Amerika ang pagpahunong sa gubat sa Lebanon.
