Gibarugan sa Estados Unidos nga abri pa ang Strait of Hormuz bisan pa sa giingon sa Iran nga kini sirado. Kahinumduman nga misamot pag-usab ang tensyon sa miaging semana human ipahibalo sa Amerika nga naigo niini ang kapin sa 140 ka target sa Iran.
Sumala sa US, tubag kini sa giingong pagpameligro sa pwersa sa Iran sa mga barkong moagi sa Strait of Hormuz, nga giingong migamit og dili awtorisadong ruta.
Niadtong Domingo, gibarugan pa usab sa Iran ang kontrol sa maong agianan ug mipahibalo nga sirado kini hangtod makapagawas sila og dugang nga pahibalo.
Samtang, naglunsad usab ang Islamic Revolutionary Guard Corps (IRGC) sa Iran og dagkong pag-atake batok sa mga base militar sa Estados Unidos. Gipahibalo usab sa United Arab Emirates, Qatar, Kuwait, Oman, ug Bahrain nga ilang natubag ang missile ug drone strikes nga giingong gikan sa Iran.
Bisan pa sa bag-ong serye sa mga pag-atake, miingon si US President Donald Trump nga ipadayon gihapon ang mga dayalogo ug paningkamotan sa mga tigpataliwala ang pagbuhi pag-usab sa proseso sa kalinaw.
