Hugot nga gibantayan sa US ang nagpadayong halapad nga protesta sa Nairobi, Kenya.
Sumala sa White House, importante nga ang gobyerno sa Kenya motubag sa mga reklamo sa mga nagprotesta.
Uban sa US, Canada, Britain, Denmark, Germany ug Netherlands natingala ug nabalaka sa nagpadayon nga kagubot sa Kenya.
Gibutyag sa British High Commission nga importante nga ang matag habig morespeto ug mopasiugda sa kalinaw aron dili modako ang panagbangi.
Ang mga sundalo gipakatag sa kadalanan sa Nairobi agig suporta sa kapulisan.
Kahinumduman nga unom ka mga nagprotesta ang napatay sa dihang nag-engkwentro ang mga pulis atubangan sa parliyamento.
Labing menos 40 ka mga tawo ang nasamdan sa dihang gipugngan sa kapulisan ang mga nagprotesta.
Ang ubang mga magbabalaod nag-lock sa ilang kaugalingon sa parliyamento human sila gilibutan sa mga nagprotesta.
Miulbo ang lihok protesta tungod sa plano nga usbawan ang buhis sa mga palaliton.
Depensa sa gobyerno nga importante ang usbaw sa buhis aron momenos ang ilang mga utang.
Base sa proposal, 16 porsiyento nga buhis ang ipahamtang sa pan ug 25 porsiyento nga buhis sa mantika.
Giisguro usab ni Kenyan president William Ruto nga iyang ipabilin ang kalinaw.
Gituohan usab nga ang mga kriminal maoy nanghulhog sa mga nagprotesta maong nagkatag sa kadalanan.
