GENERAL SANTOS CITY – Natubag na ang mga migawas nga istorya kalabot sa AIM nga matud pa huyang na ang partido tungod dili makumpleto ang linyada sa mga magpapili.
Kini human nga dungan tanan nga nag-adto sa Comelec GenSan Office og pormal nga nagduso og COC kagahapon ang pambatong pagkamayor, bise mayor og dose ka Aspirant Councilor.
Si Jay Omila ang i-atbang sa AIM kang Mayor Ronnel Rivera sa partidong PCM samtang si Atty. Tonton Acharon ang muatbang kay ABC Pres. Lorelie Pacquiao og Ryan Rivera, igsuon ni Mayor Ronnel sa pagka-bise mayor sa dakbayan.
Nagduso sa ilang kandidatura isip City Councilor silang Odjok AcharOn, Bing Dinopol, Virgie Llido, Atty. Jong Gonzales, Richard Atendido, Ed Leyson, Jun Avila, Remus Boy Declaro (kanhi kapitan sa Brgy Bula) og first timer usab sa pagkakonsehal ang mga aspirant nga silang kanhi kapitan sa Brgy South Alvin Veneracion, retiradong principal Renato Odi, kanhi City accountant Federico Cabanit, og Bebe- I Gonzales.
Samtang nagkadesisyon nga magpapili pagka-kongresista sa unang distrito sa South Cotabato si Atty. Arturo Cloma kung asa makaatbang niini si Gensan vice mayor Shirlyn Nograles. Hugot gipanghimakak sa AIM nga huyang ang ilang partido.
Samtang, upat ang mag-atbang sa pagpapili pagkamayor sa Gensan.
Kini human nga migukod kagahapon nga nagduso sa iyang CoC atul sa ulahing adlaw sa filing si Jong Ramirez. Ang nahisgutanan ang iladong historian sa dakbayan.
Nagsumite usab og COC si Bantay Bayan GenSan Head Pastor Neri Klam una pa man nanirado ang Comelec GenSan Office alas 5:00 sa hapon. Niadto pang Lunes, Oktubre 15 nagsumite sa iyang CoC aron sa subling pagpapili nga mayor si Mayor Ronnel Rivera kauban sa iyang mga ka-partido sa PCM.
Samtang, usa ka Benjamin Rivera ang aspirant sa pagkakonsehal ang nag-file usab sa iyang CoC. Nahuman na ang filing sa CoC kagahapon apan bisan naka-file na, nagpahimangno ang Comelec nga dili gihapon pwedeng mangampanya ang mga kandidato.
Ang election period magsugod sa Enero 13 hangtod Hunyo 12.
Ug ang campaign period alang sa local positions magsugod sa Marso 30, 2019 hangtod sa Mayo 11, 2019.
Samtang, sukwahi sa mga espekulasyon og unang migawas nga istorya nga magpapili pagka-mayor sa GenSan, gituldukan kini mismo ni South Cotabato 1st District Rep. Pedro ‘Jun’ Acharon Jr. human nga gianunsiyo kagahapon nga mu-retiro na siya sa pulitika og desidido siya sa iyang desisyon.
Sumala pa niini nga karong panahuna gustong hatagan og igong panahon ang iyang pamilya. Luyo niini, magpabiling magsuporta sa mga kaubanan sa partido AIM.
Una niini, sa pakighinabi sa Bombo GenSan gihatagan usab ug katin-awan ni Atty Loreto Acharon, aspirant mayor sa GenSan kung nganong wala mudayon pagkandidatu pagka Mayor ang iyang igsuon.
Kini tungod gitutukan ang kahimsog sa usa sa myembro sa pamilya hinungdan mupahulay sa pulitika.
Luyo sa maong desisyon, todo suporta si Cong. Acharon dihang gi-ubanan ang partido niining AIM sa pag-file og COC kagahapon kuyog ang ilang mga supporters.
