GENSAN – Unom ka indibidwal ang daling gidala sa ospital human sa nahitabong vehicular accident kagahapon ala 1:52 sa hapon, Marso 1, 2026, sa National Highway, Barangay Batomelong.
Base sa imbestigasyon sa kapulisan, nagsugod ang insidente sa dihang ang usa ka truck nga nakapark sa kilid sa dalan ang hinay-hinay nga mibalik pagsulod sa highway.
Samtang naglawig kini sa unahan, usa ka sakyana nga nagbiyahe sa samang direksyon gikan sa luyo ang misulay sa pag-overtake gamit ang outer lane.
Tungod sa kakusog sa dagan, aksidenteng nibangga ang atubangan sa Xpander sa luyo nga bahin sa truck.
Sa kakusog sa impact ang truck natumba paingon sa wala nga bahin sa dalan ug naguba ang luyo nga parte uban ang mga karga niini.
Samtang ang sakyanan nakasinati og grabeng pagkadaot sa tibuok atubangan nga bahin.
Ang duha ka drayber ug ang upat ka mga pasahero daling girespondihan sa rescue ambulance ug gidala sa labing duol nga ospital aron matambalan ang ilang mga samad.
Padayon ang pahinumdom sa mga otoridad ngadto sa mga motorista nga mag-amping kanunay ug magmabinantayon sa pagdrayb aron malikayan ang susamang disgrasya sa dalan.
