Nadiskubre ang usa ka underground tunnel sa gipahigayong raid sa Pampanga PNP ug local officials sa gikanayong exclusive resort nga matod pa gigamit sa ‘Chinese bosses’ nga nagdumala sa mga operasyon sa POGO sa Bamban, Tarlac ug Porac, Pampanga sumala kang Pampanga police provincial director Police Col. Jay Dimaandal.
Ang maong compound nahimutang sa Barangay Siñura, Porac Pampanga nga ‘less than 5 kms’ gikan sa mga opisina sa gi-raid nga POGO hub sa Lucky South 99 Outsourcing Inc. sa nakalabay nga bulan.
Sa gipaambit nga post ni Pampanga Governor Dennis Pineda, gibutyag niini nga gisumpay sa tunnel ang mansion ug balay sa tunga sa usa ka suba.
Sa video, makita ang pag-raid sa mga awtoridad sa underground hallway nga adunay mga naglaray nga empty shelves paingon sa mga opisina ug kuwarto.
Sa usa ka kuwarto aduna kini glass sliding doors nga maagian paingon sa usa ka gamay nga lagoon.
Aduna usab matod pa nadiskubre nga firing range.
Sumala ni PD Dimaantal, sa maong leisure hub sa Barangay Siñura gauli ang mga opisyal sa gi-raid nga POGO sa Porac.
Gibutyag pa sa PD nga nadiskubre nila ang subject sa search warrant sama sa matud pa hazing paraphernalia, handcuffs, baseball bat ug “incriminating” documents.
Gikustodiya usab sa mga awtoridad ang mga nagpuyo sa compound ug duha nga natumbok nga incorporators sa Whirlwind Corp., ang kompaniya nga nagpaarkila ug property sa Lucky South 99 sa Barangay Sta. Cruz, Porac, Pampanga.
Nadiskubre pa sa imbestigasyon sa mga awtoridad nga gipatukod ang resort ug balay nga walay building permit gikan sa opisina ni Porac Mayor Jing Capil ingon man wala kini paigo nga barangay clearance.
