Isinusulong sa House of Representataives ang isang panukalang batas para taasan ang diskwentong natatanggap ng mga senior citizen sa bansa.
Ito ay ang House Bill No. 5187 o ang proposed Expanded Senior Citizens Act of 2010 na itinutulak ni Senior Citizens Party-list Representative Rodolfo Ordanes, na naglalayong dagdagan ang benepisyo ng mga nakatatanda habang sila ay tumatanda.
Iminumungkahi ng batas na magdagdag ng limang porsyento (5%) sa kasalukuyang 20-percent senior citizen discount para sa bawat karagdagang sampung taon o dekada ng edad, simula sa pagtuntong ng 70 anyos. Sakaling maging batas, tataas na ang diswento ng senior citizen sa 25%.
Paliwang ng mambabatas na habang tumatanda ang mga senior citizen, malaki ang itinataas ng kanilang gastusin sa pangangalagang pangkalusugan, mga gamot sa maintenance, at pang-araw-araw na pamumuhay, habang ang kanilang kakayahang kumita ng pera ay patuloy namang humihina.
Kayat giit ni Ordanes, ang iminumungkahing graduated discount system ay naglalayong magbigay ng karagdagang tulong pinansyal sa mga senior citizen sa mismong panahon kung kailan nila ito pinakakinakailangan.
