Gidagsa ang kataposang adlaw sa public viewing sa namatay nga National Artist ug Superstar nga si Nora Aunor kagahapon sa Heritage Park sa Taguig City.
Kahinumduman nga namatay ang sikat nga aktres gumikan sa acute respiratory failure niadtong Abril 16, 2025.
Dinhi nahinumdoman na usab sa iyang fans ang kahawod ni Aunor, nga matud pa ‘wala’y makapuli’ sa iyang talagsaong talento sa pag-arte, pagkanta, ug pagkamatinabangon sa uban.
Matud kang Remedios Tangile Legaspi, 73 anyos nga nahinabi sa Bombo Radyo, idolo na niya si Aunor sukad pa niadtong 1972, ug dako ang iyang kasubo dihang nahibaw-an nga nitaliwan na ang iyang idolo.
Samtang emosyonal nga gihinumdoman ni Consuelo Tagle Penaflor ang mga handumanan niya kaniadto sa pagtan-aw sa mga salida ni Nora Aunor, nga nagkanayon,”piliin mo ‘yung mag mamahal sa’yo ‘wag kang nagmamahal lang ng hindi para sa’yo.”
Sa bahin sa kanhi kusinero ni Nora Aunor nga si Monet Enobeso, 71, bisan sa kainit, mapailubon siyang nagpaabot sa public viewing aron makahimamat siya sa iyang superstar idol.
Samtang base sa datus nga nakuha sa Bombo Radyo gikan sa City Health Office ug Taguig Rescue, nakaangkon lang sila og pagkalipong ug duha ka mild nga pagkaluya sa tibuok adlaw tungod sa grabeng kainit.
Bisan pa, gitanyagan nila ang mga nanambong nga libre nga tubig ug gipahinumdoman sila nga kanunay magpabilin nga hydrated kung mahimo.
Sa laing bahin, gikatakdang ipahigayon ang lubong ni Nora Aunor karong Abril 22, Martes sa Libingan Ng Mga Bayani.
