Nagtanyag ang Ukraine sa Russia og temporaryong ceasefire batok sa mga pag-atake sa mga sibilyan nga target sa Black Sea, human misaka ang mga pag-atake sa mga barko ug pantalan nga gigamit sa pag-eksport sa mga produktong pang-agrikultura sa nasod.
Nasayran nga gipadala sa Kyiv ang maong tanyag pinaagi sa usa ka third party ug naghulat pa sa tubag gikan sa Moscow.
Nagpasangil ang Russia ug Ukraine sa usag usa sa mga pag-atake sa mga barkong gigamit sa ilang exports.
Nasayran usab nga pipila na ka shipping companies ang naglikay sa pag-agi sa Odesa, nga giisip nga importanteng sentro sa grain exports sa Ukraine.
Samtang, napugos ang Russia sa pagsuspinde sa operasyon sa tulo ka terminal sa Black Sea port sa Novorossiysk human giingong giatake kini sa Ukraine, nga posibleng makaapekto usab sa grain exports sa Moscow.
Matud ni Russian Deputy Foreign Minister Alexander Grushko, wala pa sila makadawat og pormal nga hangyo alang sa ceasefire sa Black Sea.
