Mipasalig si UK Prime Minister Andy Burnham nga ipadayon sa United Kingdom ang pag-pressure batok sa Russia bisan pa sa giingong mga hulga sa Moscow.
Sa iyang unang opisyal nga pagbisita sa Ukraine isip prime minister, nakigkita si Burnham kang Ukrainian President Volodymyr Zelensky ug nangulo sa miting sa “Coalition of the Willing” nga nagkahiusa sa pagpalig-on sa suporta alang sa Ukraine.
Giingon ni Burnham nga kinahanglan ipadayon ang economic pressure batok sa Russia ug dugangan ang suporta sa Ukraine, ilabina sa air defense aron mapanalipdan ang mga sibilyan batok sa mga pag-atake.
Gipahibalo usab sa UK nga tugotan ang pagpagawas sa classified technical information bahin sa mga British-made component sa SCALP cruise missile, aron makatabang sa Ukraine sa paghimo niini sulod sa ilang nasod.
Gikondena sa Moscow ang maong lakang ug miingon nga ang paghatag sa missile technology makapasamot sa gubat, samtang mipasidaan usab kini batok sa mga pasilidad sa paghimo og missiles sa Ukraine. Apan gibasura ni Burnham ang maong pag-angkon.
Sa miting sa coalition, giawhag ni Burnham ang mga kaalyado nga dugangan ang ilang mga suplay sa Patriot interceptor missiles aron mapalig-on ang depensa sa Ukraine.
Samtang, ang mga miyembro sa coalition mipasalig nga ipadayon ang suporta sa Kyiv ug palig-onon ang mga lakang batok sa Russia.
