GENERAL SANTOS CITY – Ubay-ubay na ka mga anti-drug operations ang napahigayon sa PDEA-12 sukad sa paglingkod sa bag-o nilang regional director.
Sa pakighinabi sa Bombo Radyo, gibutyag ni PDEA-12 Director Jett Cariño, kung asa kaniadtong Disyembre pa lang, sukad sa iyang pagsugod sa pagdumala, walo na gilayon ka mga operasyon ang ilang napahigayon.
Samtang alang sa 2018, una sa ilang listahan ang nasikop nga watchlisted human ang gipahigayong raid sa Brgy Poblacion, Lambayong, Sultan Kudarat, kaniadtong Sabado.
Matud ni PDEA-12 Regional Director Jett Cariño, ang dinakpan giilang si Ricardo Gonzales, nga ilado matud pang drug pusher nga kanhi na matud pang na-tokhang, apan mibalik sa iligal nga gimbuhaton.
Dungan niini, gibutyag ni Dir. Cariño nga daghan pa ug mga musunod nga operasyon batok sa mga nalambigit sa iligal nga droga.
Ug usa sa ilang mga target mao ang mga dagkong isda kon dagkong personalidad, nga mao matud pay ginatutukan nila karon, isip sila ang kasamtangang lead agency sa kampanya sa sa gobyerno batok sa iligal nga droga.
