Target sa Estados Unidos nga maselyuhan karong Martes o Miyerkules, sa lokal nga oras, ang usa ka kasabutan nga magtugot sa pag-abli pag-usab sa Strait of Hormuz, aron makabalik ang hapsay nga pagbiyahe sa mga commercial nga barko sa maong importanteng ruta sa kadagatan.
Sumala ni Scott Bessent, nagpadayon ang ilang negosasyon uban sa Iran ug adunay posibilidad nga makab-ot ang kasabutan sulod sa duha ka adlaw. Matud pa niya, ang maong kasabutan magpasig-uli sa “freedom of movement” sa usa sa labing importante nga shipping lane sa kalibotan ug magpugong sa Iran sa pagpahamtang og toll o bayranan sa mga barkong moagi sa lugar.
Tungod sa maong pahayag, miubos ang presyo sa krudo ngadto sa ubos sa 77 dolyar matag bariles, samtang naglaom ang mga negosyante nga dali nang maablihan pag-usab ang ruta. Gituohan usab ni Bessent nga posibleng mosamot pa ang pagkunhod sa presyo sa lana kung makalihok na ang gatusan ka mga barko nga natanggong sa Persian Gulf tungod sa dugayng tensiyon sa Middle East.
Apan, gisalikway sa Iran ang giingong direktang negosasyon uban sa Estados Unidos. Gipatin-aw ni Esmail Baghaei nga wala sila karon makig-negosasyon sa U.S., kondili sa nasod nga Oman.
Matud ni Baghaei, ang ilang panaghisgot uban sa Oman nagtumong lamang sa paghimo og temporaryong kasabutan aron masiguro ang luwas nga pag-agi sa mga barko sa Strait of Hormuz. Dugang pa niya nga bisan adunay kasabutan, dili kini mahimong permanente gawas kon hunongon sa Amerika ang giingong agresibong mga lihok niini.
