Magpadala ang militar sa Estados Unidos og mga 700 ka Marines ngadto sa Los Angeles, California aron motabang sa pagmintina sa kalinaw ug kahapsay taliwala sa nagpadayon nga bayolente nga mga protesta sa maong lugar.
Kini nga lakang temporaryo nga solusyon samtang naghulat pa og dugang nga puwersa gikan sa National Guard.
Ang maong desisyon kabahin sa tubag sa administrasyon ni US President Donald Trump batok sa nagkagrabe nga mga demonstrasyon nga misugod human sa gipahigayong mga immigration raids sa Southern California.
Upat ka adlaw na nga nagpadayon ang protesta, nga gisugdan sa libo-libo ka mga demonstrador nga nagtigom atubangan sa usa ka federal detention center diin gituohang gihuptan ang pipila ka mga imigrante.
Ang sitwasyon dali nga nahimong gubot ug nagkadako ang tensiyon tali sa mga awtoridad ug mga nagprotesta.
Sa laing bahin, mikondena si California Governor Gavin Newsom sa lakang ni Trump ug mipahayag nga iyang pasakaan og kaso ang Presidente.
Mitubag si Trump nga napugos siya sa pagpadala og tropa aron mapugngan ang nagkagrabe nga kagubot ug kasamok sa lugar.
