Tun-an pa sa Armed Forces of the Philippines (AFP) ug sa US Army ang posibilidad nga gamiton ang kontrobersyal nga Typhon Missile System sa sunod nga Salaknib Exercises.
Sa interbyu sa Bombo Radyo Philippines, gibutyag ni Philippine Army spokesperson Col. Louie Dema-ala nga gihisgutan na sa mga opisyal sa duha ka nasud ang mga bag-ong konsepto nga isulod sa joint military training, lakip na ang paggamit sa Typhon Missile System ug ubang advanced weapon systems.
Sa nakatakdang pagtapos sa kasamtangang Salaknib Exercises, giila sa Philippine Army ang mga military sector ug kapasidad nga kinahanglan pa og dugang nga pagpalambo.
Matud ni Dema Ala, posibleng irekomenda sa mga military officials ang Typhon System aron pun-an ang mga kakulangan nga nasuta sa mga milabay nga tinuig nga training sa Philippine ug US Army.
Gipasabot usab ni Dema-ala nga dili lang Typhon ang tan-awon nga gamiton, apan uban pa nga rocket o missile systems depende sa resulta sa evaluation sa mga eksperto sa militar.
Sa umaabot nga 2026 nga Salaknib Exercises, posibleng ibalhin sa Visayas ang venue. Target sa Philippine Army nga magamit ang tanang strategic areas sa tibuok Pilipinas isip kabahin sa military simulation.
Dugang pa ni Dema Ala, posibleng apil na sab ang Mindanao sa mga umaabot nga tuig, base sa prinsipyo sa Archipelagic Defense Concept sa nasud nga nagtuong kinahanglan nga depensahan ang matag isla ug rehiyon sa Pilipinas.
