GENERAL SANTOS CITY – Mukabat sa tunga sa milyon ka pesos ang danyos sa pagkasunog sa Jose Catolico Puericulture Center nga makita sa City Hall compound.
Kini ang pagbana bana nga gibutyag sa mga imbestigador sa Bureau of Fire Protection sa gipahigayon nga pagsusi sa sinugdanan sa kalayo nga milamon sa tibuok gambalay.
Una nga gibutyag sa gwardiya nga si Marlon Romero nga naa ssiya sa iyang desk dihang nadunggan ang pagbuto sa taas nga bahin. Dali matud pa siyang misaka apan natagbu-an ang baga nga aso hinungdan nga mibalik na lamang sa ubos ug gipukaw ang mga duty nga midwives ug dali nga gipagawas ang ilang mga pasyente.
Gibutyag ni Myla Ismael usa sa midwives nga ilang napagawas si Abegail Grace Prejoles, nga taga Sinawal nga usa ka adlaw pa lamang nanganak, samtang gibalhin sa Diagan hospital ang nagbati nga si Aiza Reymundo, nga taga Lagao .
Nasuta nga 67 ka tuig na nga gigamit ang naasoy nga gambalay.
