GENERAL SANTOS CITY – Mukabat sa 125 gramu sa gituohang shabu samtang 17 ka armas ang nakumpiska sa otoridad sa raid nga ilang gipahigayon sa Arakan, North Cotabato partikular sa Cotabato Foundation College of Science and Technology sa Brgy. Doruloman.
Sa presscon, gibuityag sa mga opisyales sa PDEA-12 nga naaresto sa operasyon ang 3 ka tawo nga silang Abubakar Baks Uklod, Alpata Gimbangan og Ruben Gimbangan.
Apan nakasibat ang target sa raid nga si Dr. Samson Molao, ang presidente sa maong tulunghaan.
Sa impormasyon sa intel groups sa AFP og PNP, nalambigit sa drug trading og gamintina ug armed group si Dr. Molao samtang ang naaresto nga tulo katao ang kanhi matud pa BIFF member.
Matud pa, sa Arakan ang source sa droga og gina-distribute sa tibuok mindanao ilabina sa Region 12.
Gibutyag nga gihimo lamang nga prontalya ni Dr. Molao ang tulunghaan aron matabunan ang ilang iligal nga ginbuhaton.
Ang malampusong operasyon tungod sa hiniusang pwersa sa PDEA, SAF, AFP, PNP, LGU-Arakan, Arakan Municipal police station og Coatabato Prvl Police Office, intel units og uban police units.
Samtang, nagpaklaro ang taga PDEA Region 12 nganong nadugayan una pa gi-operasyunan si Dr. Samson Molao, ang presidente sa Cotabato Foundation College of Science and Technology.
Matud pa, gisugdan sa Intelligence Service sa AFP og PNP Intelligence Units ang surveillance niadtong October 2017.
Gani, nagpahigayon og mga test buy operations makapila ka higayun og didto naberipika ang kalambigitan ni Dr. Molao sa iligal nga droga hinungdan nga naka-apply ug search warrant.
Dili dali og basta -basta na lang nga magpahigayon og test buy tungod kinahanglan nga beripikahon ang lugar og mga nadawat nga impormasyon kalabut sa kalambigitan ni Dr. Molao sa drug trading.
Nagpaklaro usab ang PDEa nganong nakasibat si Dr. Molao sa lugar.
Matud pa, posibleng sa pagpadulong pa lang sa mga otoridad paingon sa tulunghaan, may mga sakop si Dr. Molao ang nakabantay ug nagreport sa nasampit.
Bisag nakasibat si Dr. Molao sa otoridad, kasuhan gihapon ang nasampit basi sa ebidensiya nga nakuha kaniya.
Gawas sa tulo ka tawo nga naaresto, lakip kasuhan pinaagi sa regular filing ang mga at large nga silang Anwar Maulana, Jerry Miklap og Jojo Gaspar.
