GENERAL SANTOS CITY – Napasaka na og kaso sa Philippine Drug Enforcement Agency (PDEA) 12 gumikan sa pagsupak sa Comprehensive Dangerous Drugs Act of 2002 o Republic Act 9165.
Ang unang nasikop mao si Rene Angeles, 38-anyos residente sa Labangal, ning syudad.
Nasikop sa Osmeña Street, Barangay Dadiangas South human nakuhaan ug duha ka putos sa gituohang shabu ug marked money.
Sunod nga operasyon nasikop si Melqesedic Marquizo 51-anyos nga taga Silway Fatima human nga nasayran nga siya ang source sa droga nga gihuptan ni Angeles.
Ang operasyon natigayon sa atubangan sa Sarangani Capitol.
Samtang mitug-an usab si Angeles, nga iyang kauban si Benjamin Lecaros 42-anyos nga fish vendor nga taga Purok Maharlika, Alabel, Sarangani Province hinungdan nga gipahigayon ang operasyon.
Base sa nakuha nga record sa PDEA 12 nga silang Angeles og Lecaros ang gradwado sa rehabilitation center sa Sarangani Province.
Apan si Marquizo ang wala pa nagdugay nga nakagawas gikan sa bilangguan.
