GENERAL SANTOS CITY – Gipailawom sa paraffin test sa crime lab ang tulo ka sakop sa Lagao Police Station human napusilan-patay ang girespondehan nga habal-habal nga nagmaoy sa Prk 19 Stephen Highway Brgy Lagao ning dakbayan.
Kini ang gibutyag ni Police Chief Inspector Aldrin Gonzales, kung asa ang nasampit nga mga pulis mao silang PO3 Datu Puti Sambuto, Po1 Ricky Jun Garles, ug PO3 Clemente Ballenas.
Gipailawom usab sa ballistic examination ang pusil sa mga nasampit, ug sa karon gipaabot na ang resulta sa gipahigayong mga eksaminasyon.
Kahibaluan nga una ang pagkapusil-patay sa biktima nga si Samuel Cornel, 50 anyos, nakig-away kini sa silingan kung asa gibadlong sa asawa nga si Mary Jane.
Apan kini hinuon ang gisumbalingan ug giingnan sa biktima nga dili manghilabot gumikan basin ug pusilon niya kini hinungdan nga mireport sa presinto.
Pagbalik sa lugar kung asa sakay si Mary Jane sa motorsiklo ni PO3 Sambuto, giunahan matud pa sila ug pusil sa biktima.
Nadakin-as matud pa si PO3 Sambuto ug subli pang gipabuthan ni Cornel, hinungdan nga mibalos ang duha ka pulis nga misunod ug gipabuthan ang biktima nga nakadagan pa sulod sa panimalay kung asa kini nahagba ug nakabsan sa kinabuhi.
Sa pagkakaron nagpadayon ang imbestigasyon sa kapulisan kalabot sa naasoy’ng insidente.
