GENERAL SANTOS CITY –Giandam na ang kasong ipasang-at batok sa tulo ka mga dinakpan sa gipatuman nga upat ka search warrants sa Barangay Pinol, Maitum, Sarangani.
Kahibaluan nga ang mga nasikop ang pulos mga target-listed ug watch-listed personalities, hinungdan nga gilusad sa hiniusang pwersa sa kapulisan ang operasyon, kung asa nasikop silang Aga Nilay, 51 anyos, waaly trabaho, residente sa lugar, kung asa nakumpiska sa iyang posisyon ang duha ka sachet nga may traces sa shabu.
Ang laing pang usa nga nasikop mao si Salig Magon, 50 anyos, usa ka mag-uuma, kung asa nakumpiska kaniya ang usa ka itum nga pitaka nga may aluminum foil nga may shabu residue, ug usa ka sachet sa shabu. Kahibaluan nga wala naabtan sa mga otoridad ang laing target nga si Basit Bucali, 42 anyos, usa ka mananagat, apan narekober gikan sa iyang panimalay ang duha ka dagko ug tulo ka gagmay nga sachet sa shabu ug mga drug paraphernalia.
Kahibaluan usab nga ang laing target ang misulay nga magpabuto ug M16 rifle hinungdan nga giunhan sa mga otoridad ug naigo sa tiyan, hinungdan nga gidala sa balay-tambalanan.
Nakumpiska sa iyang posisyon ang usa ka dakong sachet sa shabu, mga drug paraphernalia, usa ka M-16 caliber 5.56 armalite rifle, tulo ka rounder 5.56mm rifle magazines, lima ka 20 rounder 5.56 rifle magazine, 148 rounds sa 5.56 live ammunition, tulo ka hand-held radios, usa ka hand-held radio charger ug usa ka bandolier.
Kahibaluan nga mukabat sa P232,500 ang kinatibuk-ang kantidad sa shabu nga nakumpiska sa naasoy’ng operasyon.
Kasong RA 9165 o Comprehensive Dangerous Drugs Act of 2002 ug RA 10591 ang ipasang-at batok sa mga dinakpan, lakip na sa usa nga wala naabtan atul sa operasyon.
