Nagpahigayon og funeral prayer ang tulo ka anak sa namatay nga kanhing lider sa Iran nga si Ayatollah Ali Khamenei, samtang liboan ka tawo ug mga taas nga opisyal ang mitambong sa funeral ceremony sa Tehran, Iran.
Makita sa maong pagtigum sila Mostafa, Meysam, ug Masoud Khamenei nga nag-ampo atubangan sa lungon sa ilang amahan sa usa ka dako nga religious complex sa Tehran.
Nakapadani usab sa pagtagad ang wala pagtambong sa laing anak ni Ayatollah Ali nga si Mojtaba Khamenei, nga giisip nga posibleng mosunod isip Supreme Leader sa Iran.
Matod sa mga report, napatay si Ayatollah Ali Khamenei kauban ang pipila ka miyembro sa iyang pamilya human sa airstrike nga gihimo sa Estados Unidos ug Israel niadtong Pebrero 28 nga nakapahinabog gubat sa rehiyon.
Sa maong seremonya, gilatag usab ang mga lungon sa ubang paryente nga namatay lakip ang iyang anak nga babaye, manugang, ug 14-buwang gulang nga apo.
Mitambong usab ang mga taas nga opisyal sa Iran sama ni President Masoud Pezeshkian ug Parliament Speaker Mohammad Baqer Qalibaf.
Isip bahin sa pagbangotan, nagsugod ang Iran og usa ka semana nga funeral procession lakip ang pagdala sa iyang mga patayng lawas ngadto sa mga sagradong lugar sa Shi’ite sa Iraq.
Hangtod karon, wala pa gihapon magpakita sa publiko si Mojtaba Khamenei nga giingong nasamdan sa maong pag-atake, ug nagpabilin ang mga espekulasyon bahin sa iyang kahimtang apan wala pa’y opisyal nga kumpirmasyon.
