Gikuwestiyon ni Senator-Judge Raffy Tulfo ang giingong pag-una ni Impeachment Court Spokesperson Atty. Regie Tongol sa pagpagawas og ‘timetable’ alang sa pinal nga desisyon sa korte sa impeachment case batok kang Vice President Sara Duterte.
Sa hearing karong Lunes, gikuwestiyon ni Tulfo ang unang pahayag ni Tongol nga posibleng mahatag ang final verdict sa kaso sa Disyembre 16.
Matod ni Tulfo, nakahatag kini og impresyon sa publiko nga daan nang nahisgotan o napagdesisyunan sa Impeachment Court ang mahimong resulta sa pagdungog tungod sa maong pahayag.
Gipahayag ni Tulfo nga adunay pipila niyang mga kaila ug higala nga mitawag kaniya aron mangutana kung daan na bang nahibaloan o napagdesisyunan ang mahimong resulta sa impeachment case.
Giklaro usab ni Presiding Officer Chiz Escudero nga dili hingpit nga tukma ang pahayag bahin sa Disyembre 16 isip petsa sa desisyon.
Gipasabot ni Escudero nga ang maong timetable gibase lamang sa pagkalkula gikan sa pretrial order, diin nangayo ang prosecution og 61 o 62 ka trial days, samtang 30 ka trial dates usab ang gihangyo sa depensa.
Gipunting ni Escudero nga ang maong pagkalkula gibase sa matematika ug kalendaryo ug dili sa aktuwal nga dagan sa pagdungog, ilabina nga adunay mga hearing nga nakansela.
Tungod niini, gihangyo ni Tulfo si Escudero nga pahinumdoman si Tongol, ug iyang gipadayag nga dili matod pa kini unang higayon nga nagpagawas ang spokesperson og mga pahayag sa media sa wala pa kini maaprobahan o magsabotan sa mga senator-judge.
Matod ni Tulfo, ginapangunahan matod pa ang mga senator-judge sa mga impormasyong gipagawas sa media bahin sa pagdungog.
Sa kataposan, gipasalig ni Escudero nga iyang tagdon ang pahayag ni Tulfo ug molihok kalabot niini.
