Parehong miubos ang trust ug performance ratings ni Presidente Ferdinand “Bongbong” Marcos Jr. ug Bise Presidente Sara Duterte base sa pinakaulahing resulta sa survey gikan sa OCTA Research.
Santo sa survey nga naglangkob sa ikatulo nga kwarter sa 2024, adunay “gamay nga pagkunhod” sa mga numero alang kang Marcos samtang adunay “significant drop” sa record ni Sara.
Base sa resulta sa non-commissioned survey, 69% sa hamtong nga mga Filipino ang nagsalig gihapon kang Marcos nga adunay kalainan nga duha ka porsyento nga puntos gikan sa 71% nga natala sa ikaduhang quarter ning tuiga.
Sa laing bahin, ang trust ratings ni Sara mius-os ug unom ka porsyento nga puntos gikan sa 65% ngadto sa 59%.
Sa bahin sa performance, 66% sa Filipino adults ang niingon nga natagbaw sila sa performance ni Marcos samtang 12% ang wala matagbaw, ug 23% ang wala makadesisyon.
Miubos kini tungod kay sa miaging quarter, 68% sa mga Filipino adult ang natagbaw sa performance sa presidente base sa samang survey.
Ang performance rating ni Sara nius-os og walo ka porsyento nga puntos gikan sa 60% ngadto sa 52%.
Kinse porsyento sa mga respondents ang wala makontento sa iyang performance samtang 33% ang undecided nga nagpasabot nga matud pa sa OCTA ang pagduhaduha sa mga botante nagkadako.
Nakuha ni Marcos ang iyang labing taas nga trust rating sa Balanced Luzon nga adunay 78% ug labing ubos sa Mindanao nga adunay 50%. Ang mga respondents sa Balanced Luzon maoy labing natagbaw sa iyang performance nga 74% kumpara sa 48% sa Mindanao.
Sa laing bahin, ang labing taas nga trust rating ni Sara nakaplagan sa Mindanao nga adunay 95% ug pinakaubos sa Balanced Luzon nga adunay 43%. Ang performance rating kay steady sa 90% sa Mindanao apan “poor” sa Balanced Luzon nga adunay 37% ug sa National Capital Region nga adunay 38%.
Ang OCTA survey gihimo gikan sa Setyembre 4 hangtod 7, 2024 gamit ang face-to-face nga mga interbyu sa 1,200 ka hamtong sa tibuok nasod.
Kini adunay ± 3% nga margin sa sayup sa 95% nga lebel sa pagsalig.
