Nibyahe na si US President Donald Trump paingon sa Anchorage, Alaska alang sa gipaabot nga makasaysayanong summit tali niya ug ni Russian President Vladimir Putin.
Sumala sa White House, si Trump gitakda nga mobiya sa Estados Unidos ug mobiyahe sa Alaska sa alas 6:45 sa buntag, oras sa Amerka, o alas 6:45 sa gabii karong sa Biyernes, Agosto 15, oras sa Pilipinas.
Gilauman nga mobalik si Trump sa White House sa Sabado sa buntag, Agosto 16 oras sa US.
Ang pipila sa mga delegasyon sa Russia nagsugod sa pag-abut sa wala pa ang gikatakda nga summit, lakip ang Russian Foreign Minister nga si Sergey Lavrov.
Gipaabot usab nga motambong gikan sa Russia mao sila si Defense Minister Andrey Belousov ug ang sovereign wealth fund chief Kirill Dmitriev.
Walay mga representante o mga delegasyon gikan sa Ukraine nga bahin ang gilauman nga motambong.
Magsugod ang one-on-one meeting tali ni Trump ug Putin sa Joint Base Elmendorf-Richardson, ang pinakadako nga base militar sa Alaska, alas 11:00 sa gabii.
Kini sundan sa usa ka meeting sa delegasyon ug usa ka joint press conference.
Usa ka posible nga kasabutan sa pagtapos sa gubat sa Ukraine gilauman nga mao ang focus ni Trump ug Putin sa mga pakigpulong.
Gilauman nga mangayo si Putin alang sa mga konsesyon sa teritoryo ug mga limitasyon sa ambisyon sa Ukraine nga moapil sa North Atlantic Treaty Organization (NATO) ug posible nga buhion ang mga gipangayo sa Moscow gikan sa napakyas nga panaghisgot sa kalinaw.
