Nanghulga si U.S. President Donald Trump nga magpahamtang siya ug dakong multa sa estado sa California human mudaug ang 16-anyos nga transgender athlete nga si AB Hernandez og duha ka gold ug usa ka silver sa State Track and Field Championships sa Clovis.
Nagdala og kontrobersiya ang kadaugan ni Hernandez, nga usa ka transgender girl, tungod kay adunay kahadlok nga maapektuhan ang mga “biological female” nga mga atleta.
Sumala kang Trump sa usa ka post, giingon niya nga gilapas sa California ang iyang pahimangno ug angayang manubag si Governor Gavin Newsom.
Samtang gisusi na usab sa U.S. Department of Justice kung gilapas sa California ang Title IX — usa ka balaod nga nagdili sa diskriminasyon base sa gender sa mga eskwelahan nga nakadawat ug pondo gikan sa Federal Government.
Gitagaan ang CIF og deadline hangtod Hunyo 9 aron bawion ang maong polisiya.
